Gianunsyo ni businessman Anthony Pangilinan, amahan sa aktor nga si Donny Pangilinan, ang nahimong desisyon sa iyang pamilya nga mohatag og diskwento sa diesel sa ilang gasolinahan aron matabangan ang mga motorista nga makasagubang sa nagkataas nga presyo sa mga produktong petrolyo tungod sa nagkagrabe nga tensyon sa Middle East.
Sa usa ka post sa social media niadtong Lunes, si Anthony miingon nga ilang gisusi ang epekto sa pagsaka sa presyo sa gasolina, dili lamang sa ilang negosyo apan lakip na sa ilang komunidad.
Dugang niini nga ang iyang anak nga si Donny, kinsa anaa usab sa negosyo, nagsugyot og P3 nga pagkunhod kada litro sa regular nga presyo sa diesel sa ilang estasyon sa South Forbes, Cavite, nga nagsugod karong gahapong adlawa.
Sumala ni Anthony, ilang gisusi ang epekto sa pagsaka sa presyo sa lana dili lamang sa ilang negosyo apan lakip na sa mas lapad nga komunidad.
Bisan tuod ilang giangkon nga dili kini paborable kon bahin sa kita o “mga numero,” apan ang ilang tinguha nga matabangan ang mga motorista ug mga konsumidor nga grabeng naapektuhan sa sunod-sunod nga pagsaka sa presyo sa lana.
Subay niini, misaad ang pamilyang Pangilinan nga ipadayon ang pagpaubos sa presyo sa diesel basta kaya sa ilang operasyon.
Gidayeg dayon sa mga netizen ang pahibalo sa mag-amahan, diin daghan ang nahingangha sa sosyal nga panimuot ni Donny ug sa suporta sa iyang amahan.
