Gilusad sa buhatan sa Department of Tourism – Central Visayas (DOT-7) ang Balik Cebu program nga nagtinguha sa mga OFWs gikan sa bisag asang kanasuran sa kalibutan nga magiyahan sa mga kalihukan sa Sinulog 2026.
Nahitabo ang ceremonial opening sa kalihukan niadtong Miyerkules, Enero 7 sa usa ka tanyag nga mall sa uptown Cebu City diin nakapwesto ang dedicated lounge sa programa nga gipangulohan ni DOT-7 OIC Regional Director Gelena Asis Dimpas.
Miduyog sab niini sila Cebu City Mayor Nestor Archival Sr. ug si Cebu Provincial Governor Pamela “Pam” Baricuatro.
Ang programa kay nagdalit sa pag-abi-abi sa mga balikbayan nga mibalik sa Sugbo para sa Fiesta Señor ug Sinulog festival diin ang mga bisita kay mamahimong makapahuway, maka-reconnect, ug maka-access sa mga impormasyon sa mga kalihukan sa kapistahan.
Gipanglantawan ni Dimpas nga musaka sa 5% kun itandi sa nakalabayng tuig nga ihap kay ang gilaumang mupartisipar sa programa nga anaa sa 350,000.
Ang inisyatiba kay naghulagway sa kolektibong paningkamot nga makanindot pa ang kasinatian sa Sinulog nga hilabihang makatampo sa ekonomiya sa Sugbo.
