CEBU CITY- Mipagawas og katin-awan ang Cebu City Transportation Office (CCTO), kabahin sa pagdakop sa usa ka traffic enforcer niining drayber sa modern jeepney, human kini nagpasakay og pasahero tunga-tunga sa pedestrian lane atol sa go-signal, niadtong Merkules, Abril 3 ning tuiga.
Matod pa ni Raquel Arce, pangu sa CCTO, dili insakto ang konsepto bahin sa nikatap nga video sa social media atol sa pagdakop.
Gihatagan og gibug-aton sa CCTO, nga ang maong video tinuyo nga pagtuis sa kamatuoran, tungod sa laing bahin nga nakuha nga CCTV footage sa susamang panghitabo nga sukwahi sa video nga nikatap.
Dugang sa iyahang pakigsusi, bisan adunay kamatuoran nga nagpasakay kining driver og usa ka Person with Disability (PWD), nilapas gihapon kini sa gikatakdang balaod kay kini mihunong sa pedestrian lane atol sa pipila nga paglabay na sa go-signal. Diin, maoy nahimong rason nga na isyuhan kini ug citation ticket.
Matod ni Arce, ang maong drayber magbayad ug mokabot P6,000, resulta sa paglapas sa lagda sa trapiko, lakip sa usa ka kasong naduso sa korte.
Dugang pa ni Arce, nagbuhat lamang sa iyang katungdanan ang maong enforcer sa dagan sa karsada.
Sa laing bahin, gi-awhag ni Arce ang publiko nga dili uradang magpadala sa mga mokatapa nga posts sa social media ilabi na og dili tibuok ang istorya.
Una niini, naka-ani og nagkadaiyang reaksyon ang nakuha nga video sa pag-ticket sa usa ka ‘traffic enforcer’ ngadto sa drayber sa usa ka modern public utility jeepney (PUJ) nga adunay rota sa Tintay-Colon(13C) human nga nangatarungan ang drayber nga nihunong siya kay gipakasakay ang usa ka PWD nga dili makakita.
Kini nahitabo sa Dalan Colon, niadtong nakalabay nga Abril 2, 2025.(Bombo Irene Ardiente)
