CEBU – Duha pa ka mga kanhi opisyal sa nasudnong gobyerno ang miapil sa gitahasan sa pagsundog sa labing maayong gawi sa Singapore sa Queen City of the South.
Kini ang gipahibalo ni Cebu City Mayor Michael Rama karung adlawa Lunes, Septiyembre 19, kung diin iyahang gipaila silang kanhi Senador Franklin Drilon ug kanhi Department of Public Works and Highways (DPWH) Sec. Rogelio ‘Babes’ Singson isip labing bag-ong miyembro sa Advisory Council sa dakbayan.
Kung diin si Drilon ug Singson gilauman usab nga motabang sa dakbayan sa Sugbo sa tinguha nga mabawi ang easement zones, ilabina sa pito ka dagkong suba sa siyudad, ug mapaayo ang mga proyekto sa pagpugong sa baha.
Nasayran nga ang Advisory Council, lakip sa ubang mga katuyoan niini, giumol isip kabahin sa mga tumong sa administrasyong Rama nga makab-ot ang ‘Singapore-like Cebu City.
Sa usa ka pakigpulong, si Drilon nipadayag og pasalamat ngadto sa mayor ug sa ubang mga opisyal sa kagamhanan sa dakbayan sa paghimo kaniya nga kabahin sa Advisory Council.
Kung kahinumduman ang ubang mga kanhi opisyal sa nasudnong kagamhanan nga nahimong kabahin sa Advisory Council sa dakbayan sa Sugbo mao sila si kanhi Environment and Natural Resources Sec. Roy Cimatu ug kanhi PNP chief Debold Sinas.
