Gikonsiderar sa Sinulog Foundation Incorporated ang posibilidad sa paggamit og drone display alang sa Sinulog 2027, samtang nagpadayon ang pagpangandam sa siyudad alang sa umaabot nga Sinulog 2027.
Nabutang sa pagtagad ang fireworks display human sa miaging Sinulog, diin milungtad og kapin 30 minutos ang fireworks ug adunay mga grupo nga nagpahayag og kabalaka sa epekto niini sa ilang mga binuhi, ingon man sa kalikupan.
Samtang gipasiugda sa siyudad ang sustainability sa mga kalihokan, usa sa mga kapilian nga gitan-aw karon mao ang drone display isip posibleng alternatibo sa fireworks.
Matud ni Sinulog Foundation Incorporated Executive Director Elmer Jojo Labella, mahimo usab nilang pamub-on ang fireworks display kung dili mahimo ang drone show tungod sa budget.
Gipasabot ni Labella nga usa sa konsiderasyon ang gasto sa drone display, nga mas mahal kung itandi sa fireworks.
Sa pagkakaron, wala pa’y pinal nga desisyon ang executive committee, ug padayon pa ang pag-evaluate sa mga kapilian alang sa Sinulog 2027.
