Gikonsiderar sa Sinulog Foundation Inc. (SFI) ang pag-ilis sa fireworks display og drone show alang sa umaabot nga Sinulog, isip tubag sa mga sugyot ug panaghisgot bahin niini.
Matud ni Elmer “Jojo” Labella, Executive Director sa SFI, sayon ra ang pagdumala sa drone show apan mahal ang maong teknolohiya.
Gipunting niya nga niadtong 2024, nakagamit sila og mga drone tungod sa tabang sa daghang mga sponsor. Hinuon, giangkon ni Labella nga seryoso nilang gikonsiderar ang sugyot nga tangtangon na ang fireworks display tungod sa nagkalain-laing mga sugyot.
Usa sa mga nag-unang rason mao ang epekto sa fireworks sa mga langgam, nga adunay mahinungdanong papel sa kinaiyahan bisan pa man og ang mga langgam mahimong molupad palayo, balido gihapon ang mga kabalaka bahin sa ilang kahimsog ug sa kaluwasan sa ilang palibot.
Gipahibalo usab ni Labella nga sa pagkakaron, wala pa’y pinal nga desisyon ang Executive Committee bahin niini apan, mipasalig kini nga maminaw sila sa mga panaghisgot sa Advisory Board, ilabi na sa suporta ug pagtagad sa mayor sa siyudad.
Giklaro usab sa SFI nga mahimong pakunhuran nalang ang gidugayon sa fireworks display imbes nga hingpit kining tangtangon, o kaha sa paglabay sa panahon, mahimo nang matino kung aduna bay mga kasabotan alang sa drone show. via Bombo Jemm Mayot
