CENTRAL VISAYAS- Nagpadayon ang pagsaka sa temperatura sa nasud ilabina karong pagsugod sa dry season o gitawag nga “summer” sa Pilipinas.
Sumala ni Engr. Oscar Tabada, kanhi direktor sa PAGASA Visayas, normal lamang nga masinati ang init nga panahon sugod karong bulan sa Marso.
Bisan pa niini, iyang gihatagan og katin-awan nga dili gihapon malikayan ang panagsang pag-ulan tungod sa gitawag nga localized thunderstorms.
Matud pa ni Tabada, ang kainit gikan sa yuta mahimong hinungdan sa pag-develop sa mga panganod nga posibleng magdala og taligsik o kalit nga pag-ulan, bisan pa sa kasamtangang dry season.
Dugang pa niya, kasagaran sa bulan sa Abril, limitado lamang ang pag-ulan diin posibleng moabot lang og pipila ka adlaw sulod sa usa ka bulan.
Samtang, padayon usab ang epekto sa amihan nga hangin nga gilauman nga mopadayon hangtod sa bulan sa Mayo, sa dili pa kini mapulihan sa habagat nga kasagarang magdala og mas daghang ulan.
Sa laing bahin, gipahibalo usab niini nga karon anaa sa neutral condition ang klima, nga nagpasabot nga walay nag-haring El Niño o La Niña ug gilauman nga magpadayon kini hangtod sa Agosto.
Bisan pa niini, gitambagan ang publiko ilabina ang mga mag-uuma ug mga panimalay nga mag-andam sa posibleng kakulang sa tubig tungod sa taas nga temperatura ug limitado nga pag-ulan.
Gipasidan-an usab ang mga ahensya sa gobyerno ug mga local nga opisyal nga magsugod na og pagpangandam sa water supply, ilabina sa mga lugar nga kasagarang maapektuhan sa kakulang sa tubig panahon sa ting-init.
