CENTRAL VISAYAS- Mipadayag sa ilahang pahasubo ang buhatan sa Department of Social Welfare and Development – Central Visayas (DSWD-7) sa pamilyang Cuizon sa Barangay Paknaan, dakbayan sa Mandaue human sa kamatayon ni Mary Christ kansang namatay atol sa verification process sa pagpanghatag og hinabang niini.
Ang biktimang si Mary Christ kay usa sa mga benepisyaryo sa Emergency Cash Transfer (ECT) program alang sa mga biktima sa nakalabayng Bagyong Tino niadtong Nobyembre 2025 nga nasutang bag-ohay lang diay nanganak unom ka buwan ang milabay nga usa sa mga gitumbok nga hinungdan sa iyang gipamating luyang panglawas atoll sa paglinya sa hinabang nga itagana para kanila.
Inahan sa upat ka mga bata ang biktima diin ang makuhang P10,000 nga balor sa food assistance kay itampo unta niini sa iyang pamilya.
Sa pamahayag sa DSWD-7, mipadangat kini sila og pahasubo sa kabanay ni Mary Christ ingon man nga muhatag kini sila og burial assistance sa higayong makumpleto na nag death certificate niini.
Dugang pa nga magtanyag pud sila og debriefing session sa pamilya pinaagi sa WiSupport program nga naghatag og psychosocial support.
Samtang, ang buhatan sa Mandaue City Social Welfare and Development Office kay magpaabot pud og P30,000 nga hinabang sa pamilya gawas pa sa P5,250 nga ECT assistance nga pagadawaton sa iyang igsoong babaye.
Mipahimangno sa mga lokal nga panggamhanan ang DSWD-7 nga magdalit og tukmang tabang sa mga bulnerableng indibidwal sa higayong adunay taas nga linya sa mga programa sa gobyerno.
Nakigkoordinar na sa LGUs ang ahensya aron masiguro nga ang ilang verification ug payout process kay mas hapsay aron malikayan ang susamang insidente.
Kahinumduman nga niadtong Marso 11 atol sa linya sa hinabang sa Barangay Opao Gym sa dakbayan sa Mandaue, didto nakuyapan si Mary Christ nga sa dugay nga pagtamp og atensyong medikal ang usa sa mga hinungdan sa iyang kamatayon.
