Nanawagan ang pamunoan sa Department of Social Welfare and Development sa mga kandidato karong eleksyon nga seryosohon ang pagpangampanya sa mga huyang nga sektor sa katilingban.
Matod ni Social Welfare and Development Secretary Rex Gatchalian, nga kinahanglang ipataas sa mga kandidato ang lebel sa diskurso sa ilang pagpangampanya sa katawhan.
Diin mas maayo nga dili na mogamit og mga pulong nga makapainsulto kanila.
Gihimo sa kalihim ang pahayag nunot sa usa ka video nga nag-viral online diin ang usa ka kandidato nagkomento sa mga solo parent.
Gihimug-atan sa kalihim nga dili kataw-anan ang maong mga pamahayag ug komento.
Kini nagpakita lamang ug pagtamay kanila.
Gitataw usab niini nga ang tanang solo parent sa nasud makonsiderar nga bayani tungod sa ilang pag-inusarang nagsuporta sa ilang mga anak ug pamilya.
