Nadakpan ang usa ka giila nga high-value individual (HVI) sa anti-illegal drug buy-bust operation nga gihimo sa kapolisan sa Purok 7, Barangay San Isidro, Dauis, Bohol alas 8:55 sa gabii niadtong Biyernes, Hulyo 17.
Ang suspetsado giila nga si Jose Benan Del Rosario, 31 anyos, walay trabaho ug residente sa Barangay Tabajan, Guindulman, Bohol, nga giakusahan og paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002.
Ang operasyon gipangulohan sa Provincial Intelligence Unit/Provincial Drug Enforcement Unit (PIU/PDEU) sa Bohol Police Provincial Office (BPPO) ubos sa pagpangulo ni PLt. Col. Joemar S. Pomarejos, diin direktang gidumala ang buy-bust operation nila PLt. Dave H. Surio ug PLt. Noubell L. Padernal, sa pakigtambayayong sa Dauis Municipal Police Station, ilalom sa pagmando ni Bohol Police Provincial Director PCol. Patricio Degay Jr.
Nasakmit gikan sa suspetsado ang unom ka dagkong sachet ug tulo ka medium sachet sa gituohang shabu nga adunay 551.1 gramos nga gross weight ug gibanabanaang standard drug price nga ₱3,747,480.
Narekober usab ang usa ka cellphone, pouch bag nga gigamit isip sudlanan, ₱1,000 nga marked money, 11 ka piraso sa ₱1,000 boodle money, ug usa ka motorsiklo nga giingong gigamit sa ilegal nga transaksyon.
Ang mga nasakmit nga ebidensiya isumite sa Bohol Forensic Unit alang sa laboratory examination ug custody, samtang ang suspetsado temporaryong gipriso sa Dauis Municipal Police Station (MPS) lock-up facility samtang giandam ang kasong paglapas sa Sections 5 ug 11, Article II sa Republic Act No. 9165, o ang Comprehensive Dangerous Drugs Act of 2002.
