Gipaambit sa transport group nga MANIBELA nga ang giaprobahan nga P1 nga pagtaas sa plete sa tanang public utility vehicles (PUVs) dili pa igo taliwala sa nagpadayon nga pagsaka sa presyo sa lana.
Matud ni MANIBELA President Mar Valbuena nga mas dako pa og kita ang mga tawo nga nagpakilimos kon itandi mismo sa mga jeepney drayber.
Sumala sa Land Transportation Franchising and Regulatory Board, ang P1 nga pagtaas sa tradisyonal nga mga jeepney magsugod gikan sa P13 ngadto sa P14 sa unang upat ka kilometro, ug motaas og 20 sentimos kada kilometro gikan sa P1.80 ngadto sa P2. Alang sa mga modernong jeepney, ang minimum nga plete motaas og dos pesos gikan sa P15 ngadto sa P17. Samtang ang mga regular nga taxi ug motorcycle taxi wala masakop sa pagtaas.
Sa wala pa ang desisyon, ang MANIBELA nangayo og P2 nga pagtaas sa tradisyonal nga mga jeepney, tungod kay daghang mga drayber ang nawad-an og P400–P500 kada adlaw tungod sa taas nga presyo sa diesel. Tungod niini, ang mga drayber napugos sa pag-usab sa ilang mga iskedyul aron malikayan ang kompetisyon sa mga pasahero, labi na sa mga oras nga dili peak.
