Gikuwestiyon ni Caloocan City 2nd District Representative Edgar Erice ang gisugyot nga P4.37 bilyones nga dugang pondo alang sa mga proyektong imprastruktura sa unang distrito sa Ilocos Norte, ni House Majority Leader Sandro Marcos.
Subay sa datos gikan sa usa ka grupo nga nagmonitor sa badyet, ang maong kantidad gidugang sa House of Representatives alang sa Ilocos Norte 1st District Engineering Office, kon itandi sa orihinal nga National Expenditure Program (NEP) nga gisumite sa Department of Budget and Management (DBM).
Gihimug-atan ni Erice nga kinahanglang patas ang paggahin og pondo sa tanang distrito sa nasod.
Iyang gipunting nga sukad pa sa pagsugod sa 19th Congress, padayon nang nakadawat og binilyon ka pesos nga dugang pondo ang maong distrito, busa nanawagan siya sa Senado nga susihon ug tul-iron kining gitawag nga kwestiyonableng “budget insertions.”
Sa laing bahin, gipadayag sa Malacañang nga katungdanan gayod sa mga magbabalaod nga palamboon ang ilang tagsa-tagsa ka distrito, basta ang pondo gamiton sa hustong pamaagi ug dili moadto sa mga “ghost projects” o mga proyektong ubos ang kalidad.
