CEBU – Gitanggong sa prisohan ang duha ka 17-anyos nga mga lalaki human sila gipasanginlan nga nipatay sa usa ka barangay tanod, kinsa misulay sa pagpakalma sa duha ka grupo sa mga menor de edad nga nalambigit sa kagubot o away sa kadalanan pasado alas 2 sa kaadlawon sa adlaw sa Domingo Oktubre 30.
Ang duha temporaryong gitanggong sa Naga City Police Station.
Matud pa ni Police Lieutenant Colonel Junnel Caadlawon nga duha ka menor de edad ang giingong nigamit og gaff (tari sa manok) sa pagdunggab ug pagpatay kang Danilo Alerta Sr., 57, usa ka barangay tanod, samtang nisuway kini pagpahunong sa away sa dalan sa duha ka grupo sa mga menor de edad.
Ang insidente nahitabo sa Ward 1, Sitio Ardonix, Barangay Taghaguimit, dakbayan sa Naga sa habagatang Sugbo.
Dugang pa ni Caadlawon nga ang mga menor de edad miikyas human sa pag-atake ni Alerta, apan nasikop sila alas 9 sa buntag niadtong Domingo human sa followup operation.
Giingung prisohon ang mga menor de edad samtang nagpaabot sa pagpasaka sa kaso.
