CEBU CITY- Naangol ang pipila ka mga pasahero human magbangga ang duha ka tradisyonal nga public utility jeepneys (TPUJ) mga alas 9:30 sa buntag karong adlawa sa D. Jakosalem Street ug V. Gullas Street, Cebu City.
Base sa inisyal nga imbestigasyon, miresulta ang bangga sa daghang minor injuries, hinungdan sa dali nga pagresponde sa mga awtoridad. Gipadala ang Traffic Enforcement Unit sa lugar aron pagdumala sa sitwasyon, samtang ambulansya ang miabot aron paghatag og medikal nga tabang sa mga nasamdan.
Usa ka tow truck usab ang gigamit aron tangtangon ang mga nalambigit nga sakyanan ug mapaspasan ang pag-abli sa dalan nga temporaryong naapektuhan sa trapiko.
Sa pakighinabi sa Bombo News team, si Florencio Gabunada, drayber sa 04L jeepney, miangkon nga giapas niya ang green light sa traffic signal mao nga wala niya namatikdan ang pikas nga jeep.
Samtang, si Esencio Baculi, drayber sa 04i jeepney nga paingon unta sa Downtown Colon, miingon nga pagkahuman sa green signal sa traffic light, niabante siya sa dalan apan kalit nga nabangaan sa laing jeep nga kusog ang dagan.
Gidugang niya nga upat ka pasahero ang nakaangkon og gagmay nga samad, samtang siya mismo nakasinati og sakit sa likod tungod sa impact sa bangga.
Ang duha ka jeepney adunay mga sakay nga pasahero sa panahon sa insidente, sumala sa mga awtoridad. |With reports of Bombo Rocky Lavarez
