Hingpit nang gitang-gitang sa kagamhanan sa dakbayan sa Mandaue ang duha ka mga Job Order employee, nga nalambigit sa giingung pagdispalko sa kwarta sa Mandaue Treasury Office.
Matud ni Atty. Sally Malig-on ang City Administrator sa dakbayan sa Mandaue, nga aduna nay gisumiter nga rekomendasyon ang City legal office sa opisina sa Mayor niadtong Oktubre 17, Biyernes.
Gibutyag ni Malig-on, nga girekomendar sa legal office ang pagpatang-tang sa duha ka mga empleyado lakip na usab ang pagpasiugda sa pagpasaka ug kasong criminal batok sa mga nalambigit, dugang usab niini ang pagpauli sa mga kwarta nga nadispalko nga mokabat sa P290,000 lakip usab ang pagpirma ug undertaking nga ila kining bayaran.
Sigon usab sa opisyal nga mipagawas usab og kamandoan ang buhatan sa pagpatubag sa supervisor sa maong opisina gumikan sa rason nga wala mabantayi ang pagpang dispalko sa mga nalambigit.
Buot usab sa kagamhanan nga mapasaka na ang kaso ug madali ang pagdungog sa premirong kaso sa pagpangdispalko sa P3.3 Million nga kwarta sa kagamhanan.
Dugang pa ni Malig-on nga padayun pa usab ang pag-imbestigar sa maong kaso ug possible usab nga mohimo sila ug lakang sa pag-imbestigar sa laing opisina usab.
Lakip usab nga imbestigaran sa kagamhanan ang mga opisina nga adunay mga empleyado nga wala nag tarong ug trabaho sa opisina hilabi na sa magduwa ug matulog ra sa oras sa trabaho.
