Gibutyag sa Cebu City Police Office nga nasikop sa kapulisan ang duha ka mga lalaki nga nalambigit sa nag-viral online nga insidente sa harassment ngadto sa usa ka off duty call center agent samtang naglakaw kini sa Osmeña Blvd ug Colon St, Downtown Cebu City pasado alas 5 sa buntag nadtong adlawng Martes, Agosto 11, 2026
Ang duha ka mga lalaki positibong giila ni CCPO Deputy Chief for Administration PLTCOL Franc Rudolf Oriol nga parehong mga lalaki nga miharass kang Rey Anthony Abing, call center agent, nga giingong misunod, mituok ug miakusar nga adunay shabu atubangan sa usa ka police officer sa elevated outpost sa Colon St.
Nunot niining insidente, mihimo og Facebook post si Abing diin siya mialegar nga kini usa ka matang sa “tanim-shabu” modus ug miakusar sa duha ka mga lalaki nga mga sakop sa kapulisan. Ang mao na post miani ug 5.2K shares online
Matud ni Oriol nga ang duha nasikop sa managlahing operasyon sa kapulisan diin sila nasakmitan og ilegal nga drugas ug ilegal nga armas. Kasamtangan karon nga gibalhug ang duha ka mga lalaki sa Waterfront Police Station 3
Dako ang pagduda nga posibleng mistaken identity ang nahitabo sa biktima ug ila sab gisusi ang posibilidad sa usa ka modus may kalabot sa ilegal nga druhas
Gipanghimakak sab ni Oriol taho nga ang maong duha ka mga suspek sakop sa mga kapulisan ug nagpadayon ang lawom nga imbestigasyon sa kapulisan sa maong insidente
Giawhag usab ni Oriol ang publiko nga kun ugali makasugat ug susamang insidente diin adunay mga tawo magpakarong-ingon isip miyembro sa kapulisan nga mas maayo moduol sa mga pinakaduol nga mga police officers sa area o motawag sa 911 aron mahatagan kini ug aksyon sa kapulisan
