CEBU CITY- Gidakop ang duha ka trabahante og punerarya ug kauban niini nga usa ka menor de edad human masakpan sa pagangawat og kable sa Pilipinas Water Resources Inc. ngadtu sa South Road Properties, Barangay Mambaling, siyudad sa Sugbo alas 2:00 sa kaadlawon, Miyerkules, Nobyembre 6, 2024.
Sa pakighinabi kang Police Major Efren Diaz, ang hepe sa Mambaling Police Station 11, gitino niini nga sa imbestigasyon sa Mambaling police station, nasuta nga nasakpan sa akto sa mga gwardya sa Pilipinas Water Resources Incorporated ang mga suspetsado nga nanguha ug duha ka Kable.
Mikabat ug P252, 000 ang duha ka kable, kana gumikan kay ang usa ka kable nga nagsukod sa 50sqmm royal cord nagkantitad og P159,600 pesos, samtang ang 38meters ug usa ka 22meters nagkantidad kini og P92,400.
Gidugang ni Diaz, nga una na nga nahibulong ang tag-iya sa sakyanan sa punerarya, kana gumikan kay taga buntag mawala kini sa parking area bisan og wala’y customer.
Dugang pa niini, nga ang maong mga cable gisakay na unta nila sa sakyanan sa punerarya nga ilang gitrabahoan dihang nasakpan kini sa akto sa mga gwardya, nga maoy pormal nga misang-at og reklamo ngadtu sa Mambaling police station.
