CEBU CITY-Nasikop ug misurrender na ang duha ka lalaki nga nanulis sa coffee shop sa Salinas Drive, Barangay Lahug sa dakbayan sa Sugbo nga gidala sa Cebu City Police Office.
Mipaabot si PCOL Ireneo B. Dalogdog, City Director sa CCPO pinaagi ni Rafter og padayeg sa Station 4 nga gipanguluhan ni Police Major Eraño Regidor gumikan sa pag-sikop sa usa sa mga suspetsado.
Nasikop si Cyrus John Rallos niadtong Martes sa gabii Oktubre 31, 2023 sa mismong balay niini sa Purok 4, Barangay Kamputhaw.
Lakip na nga gipasalamatan ang kapulisan sa Mandaue City sa pagkipag coordinate sa pagsurrender sa suspetsado nga si Arvin Malolot diin mi-surrender sa Mandaue City Police Office.
Subay niini, pasakahan og duha ka kaso nga robbery ang mga suspek, gumikan sa pagkawat sa kwarta nga nagkantidad ug usa kalibo apil na ang cellphone sa usa ka customer.
Gitataw usab ni Rafter nga ang usa sa mga suspetsado adunay kaso kaniadto nga pagpanulis apan napyansahan mao nga mibalik na usab kini og pagpangawat.
Sa kasamtangan, gipaningkamot sa kapulisan ang pagrecover sa pusil nga gigamit aron sa pagsusi kung unsa kini ka-tinuod.
