CEBU – Duha ka mga mahuyang ang gisikop ug nagtingkagol sa Liloan Police Station human nga gireklamo ug sexual abuse sa usa ka 15 anyos nga lalaki.
Giila ang mga suspek nga sila si Jonel Alin Palang, 28-anyos nga taga Purok Nangka, Garing, Consolacion ug si Rennard Rosales Sumotia, 25-anyos ug taga Purok 11, Lapyahan, Labogon, dakbayan sa Mandaue.
Ang biktima kay usa ka tinun-an sa Grade 11, nga taga Barangay Jubay, Liloan.
Sa imbestigasyon sa kapulisan sa Liloan Police Station, giingong niadtong Agosto 7, 2022, pasado alas 7 sa gabii, naglakaw ang biktima sa dalan sa dihang giduol kini ni Palang ug kalit nga nanghikap sa kinatawo niini samtang gikuptan ang wala nga bukton.
Matud pa, gipugos kini ug pasakay sa motorsiklo ug gidala sa kalibunan.
Giingong gipahubo ni Palang ang tibuok sapot sa biktima ug nipaduwa sa kinatawo niini, samtang nahimong ‘lookout’ si Sumotia.
Samtang nagduwa ang biktima sa kinatawo giingong nagkuha si Palang ug video ingon man mga hulagway.
Mag-atubang ug patong-patong nga kaso ang mga naasoy nga mahuyang sama na lang sa ‘acts of lasciviousness’ sa RA 7610 o Special Protection of Children Against Abuse, Exploitation and Discrimination Act, ingon man ang RA 9995 o ang Anti-Photo and Video Voyeurism Act.
