USA — Gipamatuod sa kabumberuhan sa California nga pwede sila mahimong superhero sa ilang pamaagi.
Kini human nga ilang giluwas ang duha ka mga itoy sa Carmichael, California.
Parehong nawad-an og panimuot ang duha ka mga gagmayng iro human kini giluwas sa mga bumbero gikan sa nasunog nga panimalay.
Apan wala gayud misurender ang mga bumbero sa tinguha nga maluwas pa ang kinabuhi sa mga cute nga itoy.
Sa usa ka report, gibutngan sa mga sakop sa Sacramento Metropolitan Fire District og oxygen masks ang mga itoy nga silang Cocoa ug Kiwi ug gibubu-an pa kini og tubig.
Pagkataud-taud, nabuhi ug nabalik sa maayong panimuot ang duha ka mga iro.
Nalipay gihapon ang mga bumbero sa dihang nagpatungod ang baba sa iro ngadto sa oxygen mask bisan pa man nga anaa sila sa maayong kahimtang.
Hilabihan ang nasinating kalipay sa tag-iya sa nahisgutang mga iro human nga giluwas sa mga bumbero ang alaga niini.
Kini nagpamatuod nga pinaagi sa kinasingkasing nga pagtabang sa laing, tawo man o iro, pwedeng mahimong superhero ang matag usa.
