Giimbistigahan na sa Embahada sa Pilipinas sa United Arab Emirates ang mga report nga giingong duha ka Pilipino ang gidakop sa Dubai tungod sa giingong pagrekord ug pagpaambit sa mga video nga may kalabotan sa bag-ohay nga mga pag-atake sa nasud.
Sa usa ka pahayag, ang Embahada sa Pilipinas sa Abu Dhabi ug ang Consulate General sa Dubai miingon nga nangayo sila og opisyal nga kumpirmasyon gikan sa mga awtoridad sa UAE bahin sa identity, kasamtangang kahimtang, ug legal nga sitwasyon sa duha ka Pilipino nga nalambigit.
Sumala sa mga opisyal, gitahod sa Pilipinas ang soberanya sa UAE ug ang pagpatuman niini sa mga balaod nga may kalabotan sa nasudnong seguridad, cybercrime, ug kahusay sa publiko human sa pahinumdom gikan sa mga awtoridad sa UAE nga ang pagpaambit sa sayop o wala mapamatud-i nga impormasyon, lakip ang mga video sa mga interception sa air defense, mga pag-atake sa mga landmark, bisan ang mga video nga gihimo sa AI, mahimong isipon nga usa ka krimen nga masilotan sa pagkapriso ug dagkong multa.
Tungod niini, nanawagan ang mga opisyal sa diplomasya sa mga Pilipino sa UAE nga mag-amping sa ilang mga online nga kalihokan ug gitambagan ang komunidad nga dili mag-download sa mga video, mag-post online o magkomento sa wala makumpirmar nga mga isyu sa seguridad, ug mosalig sa mga opisyal nga pahayag gikan sa gobyerno sa UAE.
Samtang, duha ka Pilipino ang gikataho nga lakip sa 25 ka tawo nga gidakop tungod sa giingong pagpaambit sa mga video online nga may kalabotan sa mga pag-atake. Apil usab sa mga nadakpan ang pipila ka mga langyaw gikan sa India, Pakistan, ug Bangladesh.
