LAPU-LAPU CITY, CEBU- Gikustodiya na karon sa Bureau of Immigration (BI) ang duha ka South Korean nationals human nasikop sa dungan nga operasyon sa Lapu-Lapu City niadtong Hulyo 2, 2026.
Ang malampusong operasyon gipangulohan sa Police Regional Office 7 (PRO7), kaabag ang BI ug uban pang yunit sa pagpatuman sa balaod.
Giila ang mga nadakpan nga mga alyas “Nam” ug “Bae,” nga gi-raid sa managlahing lugar sa Barangay Marigondon, dakbayan sa Lapu-Lapu, mga alas 3:00 sa hapon.
Si alyas “Nam” nasikop sa Pacific Grand Villa base sa warrant nga gi-isyu sa Seoul Eastern District Court tungod sa paglapas sa Criminal Act sa South Korea, siya usab subject sa Interpol Red Notice ug Summary Deportation Order.
Gikumpirma nga aduna kini napulo ka kaso kaniadto sa insurance fraud ug pagpamakak, ug giingong nalambigit sa usa ka voice phishing syndicate nga nag-operate sa Cambodia.
Sa laing bahin, si alyas “Bae” nadakpan sa Saekyung Village 1 pinaagi sa warrant gikan sa Uijeongbu District Court.
Giila siya sa BI isip undesirable, undocumented, ug overstaying nga langyaw human kumpirmahon sa Embassy of the Republic of Korea nga pugante kini sa balaod.
Gidala karon ang duha sa BI–Field Service Unit alang sa hustong dokumentasyon ug proseso sa ilang deportasyon.
Gidayeg ni PRO7 Regional Director PBGEN Arnold E. Abad ang koordinadong operasyon sa mga ahensya, ug mipasiugda nga ang pagbatok sa transnational crimes nagkinahanglan og lig-on nga intelihensiya ug dinaliang panagtambayayong sa lain-laing institusyon sa balaod.
