CEBU CITY– Tagaan ni Cebu City Mayor Edgardo Labella ang dul-an usa ka libo ka mga basurero og bonus gumikan sa ilang impresibo nga nahimo kung diin dali kaayo nga nalimpyo ang basura sa Sugbo human sa Sinulog.
Kini bisan paman og naabot sa 131 ka toneladang basura ang nakuha human sa kasaulugan.
Giangkon sa mayor nga mismo siya nakasaksi sa kadaghan sa basura apan iya matud pa nga gimanduan ang bagong head sa Department of Public Services (DPS) nga si Atty. John Jigo Dacua nga sa dili pa ang musilang ang adlaw sa buntag malimpyo na ang kadalanan. Subay niini, na-impress ang mayor nga sa iyang pagbalik dali ra nalimpyo ang dalan.
Hatagan ang mga basurero ingon man mga metro aids ug 10 ka kilong bugas matag usa agig bonus.
Samtang, dako usab ang pasalamat ni Labella sa kapulisan ilabina ni CCPO Dir. PCol. Engelbert Soriano ug PRO-7 Dir. BGen. Valeriano De Leon gumikan sa kalampusan sa Sinulog kung seguridad na ang hisgutan.
Pagsaysay pa sa mayor nga sukad pa pag-abli sa novena mass sa unang adlaw hangtud sa katapusang adlaw kanunay sila naa sa iyang opisina alang sa security assessment.
Wala matud pa silay tarong tulog hinungdan nga dako kaayo ang pasalamat ni Labella sa mga kapulisan.
