CEBU CITY — Anaa sa kustodiya sa PNP ang 170 ka mga lalaki human maabtan sa otoridad nga namuwang kagahapon sa Sitio Luwan-Luwan, Brgy. Poblacion, dakbayan sa Carcar, Cebu.
Kini human gironda sa mga sakop sa Provincial Intelligence Branch, Regional Intelligence Division (RID)-7, ug Carcar City PNP ang buwangan nga Triple A Galleria nga nahimutang sa nahisgutang lugar.
Matud ni Police Staff Sergeant Regie Ahmad sa Carcar PNP nga sa dihang mi-abot ang mga pulis, nagdinaganay ang mga namuwang ug nakahigayon pa og ikyas ang uban pa.
Dugang pa niini nga nakaangkon og minor injuries ang pipila ka mga manariay human milayat sa cockfighting arena aron lang makalingkawas.
Narekober sa mga otoridad ang duha ka mga patay nga manok nga igtatari, 35 ka mga buhing sunoy, ug giingong pusta nga mobalor og kapin P16,000.
Natanggong ang gatusan ka mga dinakpan sa usa ka covered court sa Brgy. Poblacion ug mag-atubang og kasong kalapasan sa Presidential Decree 1602 o illegal cockfighting.
Gibutyag usab ni Ahmad nga nagtapok sa buhatan sa kapulisan ang mga asawa human masayud sa maong panghitabo.
Aron nga temporaryong makagawas, kinahanglan, matud pa, nga mopyansa og P6,500 ang dinakpan. (gn)
