MANDAUE CITY,CEBU- Nasuta nga dili angayan kan-on ang 397 ka sako sa National Food Authority (NFA) rice nga wala mabaligya ug gihipos sa dakbayan sa Mandaue, base sa findings sa City Agriculture Office (CAO) ug City Health Office (CHO).
Gikumpirma ni City Administrator Gonzalo “Sally” Malig-on nga nisumiter ang CAO sa ilang report ngadto kang Mayor Thadeo Jovito “Jonkie” Ouano niadtong Miyerkules, Agosto 6, nga gisundan sa resulta gikan sa CHO niadtong Huwebes sa buntag, Agosto 7.
Gisulti ni Malig-on nga ang duha ka buhatan nirekomendar nga ang bugas, ilabi na ang giablihan nga mga sako, dili angay nga kan-on tungod sa kontaminasyon nga ilang nakit-an. Ang wala pa maablihan nga mga sako gihangyo nga ipaubos sa dugang nga pagsusi sa mga eksperto nga ahensya.
Una na nga nimando si Mayor Ouano nga dili ipamaligya o ipang-apod ang bugas aron maprotektahan ang kahimsog sa publiko.
Ang bugas gikan sa Sugbo Merkado Barato program nga nagtanyag og subsidized nga bugas sa P20 matag kilo gamit ang QR-coded cards. Napahunong ang distribusyon panahon sa 2025 election ug sobra usa ka tuig nang gitipigan ang bugas, nga posible nakaapekto sa kalidad niini.
Gitan-aw karon sa mga opisyal kon unsaon pag-dispose sa bugas ug gisusi ang mga kasabotan sa probinsya.
