Kapin sa 22,000 ka pamilya o halos 75,000 ka indibidwal sa nagkalain-laing lungsod sa Eastern Samar ang naapektuhan sa mga baha nga gipahinabo sa shearline, kini gibase sa datos nga gipagawas sa PDRRMO.
Sa maong datos, ang mga pamilya nga labing naapektuhan natala sa Llorente, Dolores, Lawaan, Jipapad, Borongan City, ug Arteche.
Moabot sa 717 ka pamilya o kapin sa 2,400 ka indibidwal ang gipabakwit, kasagaran gikan sa Jipapad ug Arteche, diin ang uban gitugotan nga makabalik human mihubas ang baha.
Gi-report usab sa ahensya nga adunay duha ka nawala nga indibidwal sa Llorente diin ang usa nakit-an samtang nagpadayon ang pagpangita sa usa.
Ang tubig baha hangtod sa tuhod, hangtod sa hawak sa 62 ka mga barangay sa tibuok probinsya samtang ang mga pagdahili sa yuta natala sa Taft ug Borongan City.
