CEBU – Mokabat sa P3.9 milyones nga kantidad sa iligal nga drogas ang nasakmit sa kapulisan sa dakbayan sa Danao gikan sa duha ka gitudlong high-level illegal drug traders sa Central Visayas.
Human sa usa ka semana nga surveillance sa Danao City Police sa pagpangu sa hepe nga si PLtCol Maribel Getigan inabagan sa operatiba sa RIU-7, nahulog sa kamot sa otoridad ang mga suspek nga silang Josephus Tapayan sa Poblacion, dakbayan sa Danao og ang kauban niini nga si Liezel Surigao hingkod ang panu-igon, taga Parian dakbayan sa Sugbo human sa gipahigayong buybust operation.
Nakuha gikan sa mga dinakpan ang 12 ka sachet nga adunay gituhu-ang shabu og walo pa ka laing sachet nga may gidudahang iligal nga drogas. Mokabat sa 575 gramos ang gibug-aton sa maong gituhu-ang iligal nga drogas nga gibana-banaang mokabat sa dul-an P4 milyones. Lakip sa nakuha gikan sa mga suspetsado ang mga ebidensiya batok sa mga nahisgutan.
Kasamtangan na nga nabilanggo ang mga dinakpan sa selda sa Danao PNP samtang gi-asikaso na ang tukmang kaso nga atubangon sa mga nahisgutan.
Samtang sikop ang 21 ka mga indibidwal human nagtigbakay atol sa Biyernes Santo sa managlahing lugar sa dakbayan sa Danao. Lakip sa mga lugar diin naghimo ang mga dinakpan sa maong iligal nga sugal ang Brgy. Guinsay, Brgy Suba og Brgy. Santican.
Nakuha gikan sa mga nadakpan ang mga ebidensiya nga gilangkuban sa kwarta, buwang og manok igta-tari. Nag-atubang na og tukmang kaso ang mga dinakpan nga anaa sa kustodiya sa kapulisan sa dakbayan sa Danao.
Samtang pabilin usab nga gipahugtan sa Danao PNP ang pagbantay sa mga borders nunot sa gipatumang curfew subay sa Enhanced Community Quarantine (ECQ) gumikan sa hulga sa Coronavirus Disease 2019.
