PROVINCE OF CEBU- Gidala sa luwas nga lugar ang anaa sa 3,392 ka pamilya o 9,802 ka indibidwal sa Probinsya sa Bohol human maigo sa Tropical Depression Basyang karong adlawa, sumala sa datos sa PDRRMO.
Sa pakighinabi sa Bombo Newsteam, giingon ni Dr. Anthony Demalirio, ang head sa PDRRMO Bohol nga padayon ang pag-monitor sa epekto sa TD Basyang, ilabi na sa mga sapa ug suba nga posibleng makahatag og kalit nga pagbaha.
Gisuspendi usab ang klase ug trabaho sa pipila ka lugar aron mapanalipdan ang katawhan.
Dugang pa, nga tungod sa dautang panahon, gikansela ang tanang tourist activities ug biyahe sa dagat sa tibuok probinsya aron malikayan ang posibleng disgrasya.
Gipahinumduman usab ang publiko ang pagpabiling alerto, pagsunod sa mga pahibalo sa LGU ug disaster response teams, ug paglikay sa dili kinahanglan nga pagbiyahe.
Bisan hinay ang ulan sa kasamtangan, nagpabilin ang alerto sa lokal nga kagamhanan tungod sa posibilidad sa pagtaas sa tubig sa mga sapa ug suba.
Ang lokal nga kagamhanan nag-awhag sa publiko sa pag-andam sa pamilya ug panimalay, ug sa paghatag og prayoridad sa kaluwasan samtang nagpadayon ang epekto sa TD Basyang.
