TAGBILARAN, BOHOL-Nasakmit sa kapulisan sa Tagbilaran Police Station ang dul-an sa P10.2 milyones nga kantidad sa illegal nga drugas atol sa gipahigayon nga buy bust operations sa Purok 7, Dangoy Street, Barangay Bool, Tagbilaran City, Bohol.
Giila ang dinakpan nga si Mark Anthony Pilayre, 34-anyos, residente sa Centro 2, Barangay Bool, Tagbilaran City, ug nakuha sa iyang posesyon ang binulto nga gidudahang shabu nga motimbang og 1.5 kilo ug gibana-banang mobalor ug P10.2 milyones ka pesos.
Gawas sa gidudahang shabu kay narecover usab sa iyang posesyon sa suspek ang usa ka KG-9 submachine gun ug mga bala niini.
Matud ni Police LT. COL. John Kareen Escober, ang hepe sa Tagbilaran Police Station nga ang suspek kay gikataho nga makadispose og dul-an 3 ka kilo sa shabu matag semana sa mga kasikbit nga mga lungsod sa Dakbayan sa Tagbilaran.//
Sa pagkakaron, anaa sa kustodiya sa kapulisan sa Tagbilaran City Police Station ang suspek ug gikatakda nga pasakaan og kasong kalapasan sa Sections 5 and 11, Article II of Republic Act (RA) 9165 o Comprehensive Dangerous Drugs Act of 2002, RA 10591 o Comprehensive Law on Firearms and Ammunition, ug kalapasan sa Comelec gun ban. | Bombo Rexmond Omega
