CEBU CITY — Gikalipay sa mga pamilyang apektado sa killer landslide sa Naga City, Cebu ang libre nga pabalay gikan sa national government, ingon man ni Presidente Rodrigo Duterte.
Kini subay na sa gipahigayong groundbreaking ceremony sa duha ka ektaryang housing project sa Brgy. Inoburan ug Tinaan sa nahisgutang dakbayan alang sa 213 ka mga pamilya.
Gikatakdang tukuron sa National Housing Authority ang 192 ka mga balay alang sa mga beneificiaries diin nahimutang kini sa usa ka portion sa Balili property.
Atol sa speech ni Presidente Duterte, kini nagkanayon nga nadungog niini ang hangyo sa mga apektado sa killer landslide nga nahitabo niadytong Setyembre 20, 2018 sa sayong kabuntagon.
Dugang pa niini nga dili na kinahanglang mobayad ang mga beneficiaries og 400 pesos matag buwan isip usa ka gasa ug tabang ngadto kanila.
Samtang malipayon ang usa sa mga beneficiary nga si Martina Dizon alang sa maong proyekto.
Matud ni Dizon nga dako og tabang ang maong libreng pabalay gikan sa gobyerno ug makaangkon na gayud og kaugalingon nilang panimalay.
Gitinguha sa NHA nga matukod ang permanent housing project sulod sa 408 calendar days.
Gitambongan ang maong groundbreaking ceremonies sa mga opisyal nga silang Presidential Assistant for the Visayas Michael Lloyd Dino, Housing and Urban Development Coordinating Council (HUDCC) Chair Secretary Eduardo Del Rosario, National Housing Authority (NHA) General Manager Marcelino Escalada, Jr., Naga City Acting Mayor Kristine Vanessa Chiong, ug uban pang mga opisyal sa gobyerno.
