Nipasaka og reklamo si Duterte Youth chairperson Ronald sa Office of the Ombudsman batok sa pipila ka mga opisyal sa Commission on Elections (Comelec) tungod sa pagsuspenso sa proklamasyon sa ilang mga party-list nominees.
Sumala sa reklamo, ang rekomendasyon sa pipila ka opisyal sa Comelec nga i-postpone ang proklamasyon sa Duterte Youth kay “illegal” ug ‘klaro nga pag-abuso sa gahom’.
Matud pa usab ni Cardema nga ang Comelec Resolution No. 11140 wala maghatag sa Supervisory Committee og gahom sa pagrekomendar og suspensiyon nga giingong nakalapas sa Anti-Graft and Corrupt Practices Act.
Dugang pa niini nga ang pag-postpone sa proklamasyon kay giingong nakadaot sa kapin 2.3 milyones ka mga botanteng Pilipino nga mibotar kanila.
Lakip sa mga reklamante mao sila si Comelec Executive Director Teopisto Elnas Jr., Deputy Executive Directors Rafael Olaño ug Helen Aguila-Flores, ingon man pipila ka kawani sa Election Records and Statistics Department.
Gawas sa reklamo ngadto sa Ombudsman, gihangyo usab ni Duterte Youth ang Commission on Appointments nga babagan ang kompirmasyon sa duha ka Comelec Commissioners nga sila si Noli Pipo ug Norina Casingal, kinsa nipirma sa resolusyon nga nag-postpone sa proklamasyon.
Samtang, gihimakak sa Comelec ang mga pasangil ug gikanayon sa tigpamaba sa Comelec nga si Rex Laudiangco, nga ang mga Commissioners nga nipirma sa maong resolusyon adunay igong awtoridad, ug dili kini makonsiderar nga ‘grave abuse of discretion.’
Dugang pa niya nga ang dungan nga pag-apelar sa Duterte Youth ngadto sa Korte Suprema ug Commission on Appointments makonsiderar nga forum shopping.
