CEBU CITY-Gihimug-atan ni Dr. Rene Josef Bullecer nga isip usa ka doktor angayan lamang nga duna’y ‘total banned’ sa mga e-cigarretes o vape.
Kini human nga pipila na usab ka pagtoon sa gawas sa nasud ang nagpakita nga makadaot kini og muabot na sa kapin 20 ka mga Amerkano ang namatay tungod niini.
Dugang pa nga ang mga manggamitay og vape karon sa Pilipinas ang mikontra sa maong banning tungod kay wala matud pa kini igo nga basihan human nga ang FDA wala pay gipagawas.
Pagtino ni Bullecer atol sa pakighinabi sa Bombo Radyo Cebu nga, angayan nga i-ban kining Vape sanglit bisan paman og dili sama sa kadaghang nicotine ang makuha niini itandi sa sigarilyo, duna kini likido nga dunay mga sagol nga chemical.
Mu-init lamang matud pa ang chemical gamit ang battery butang nga mas delikado pa kini.Gihimug-atan ni Bullecer nga duna kini mga component nga dili maayo sa baga.
Samtang, nasuta nga bisan paman og mga hulagway sa mga nagkadaiyang sakit ang naa sa packaging sa sigarilyo, wala gihapon mikunhod ang ihap sa mga smokers.
Mas maayo matud pa ni Bullecer nga ang ibutang nalang sa packaging mao ang hulagway sa sementeryo.
