Nadaog ni Filipino pole vault star Ernest John “EJ” Obiena ang unang PATAFA Pole Vault Challenge nga gipahigayon sa Vermosa Sports Hub sa Cavite.
Na-clear ni Obiena ang 5.80 meters nga gitas-on ug nagmalampuson bisan pa sa pagbunok sa uwan.
Iyang gipildi si Yan-Han Wu sa Chinese Taipei kinsa nakalahutay sa gitas-on nga 5.15 meters aron makuha ang silver medal.
Samtang ang iyang laing kaatbang, nga si Hokett Delos Santos, nga taga Pilipinas, nakaangkon sa bronze human sa pag-clear sa 5.15 meters pinaagi sa countback.
Nalipay usab si Obiena ug nagpasalamat sa mga partisipante ug sa mga nitambong.
Mitapos si Obiena sa ikalima sa second stop sa Wanda Diamond League sa Shanghai niadtong Sabado diin iyang gihawiran ang 5.72 meters ug ikapito sa Xiamen leg niadtong Abril.
Ang Pinoy Olympian kasamtangang nangandam alang sa umaabot nga Asian Championship gikan sa Mayo 27 hangtod 31 sa Gumi, South Korea.
