Nanawagan ang Chinese Embassy to the Philippines sa gobyerno nga i-ban ang Philippine Offshore Gaming Operations (POGOs) sa nasud diin kadaghanan sa mga nalambigit mga Chinese nationals.
Sumala sa Embahada, ang balaod sa China nagdili sa tanang matang sa sugal.
Matod usab niya nga hugot nga gipugngan sa gobyerno sa China ang mga Chinese citizens sa pagnegosyo sa sugal sa gawas sa nasud lakip na ang POGO.
Dugang pa sa embahada nga ang POGO makadaot sa interes ug imahe sa Pilipinas ug China ingon man sa relasyon sa duha ka nasod.
Kalabot niini, siya miingon nga ang gobyerno sa China nakig-alayon sa mga awtoridad sa Pilipinas kalabot sa mga Chinese national nga nalambigit sa ilegal nga kalihokan sa nasod.
Kusganon usab nga gisupak niini ang bisan unsang walay basehanan nga akusasyon batok sa China kalabot sa isyu sa POGO.
Mihimo usab ang Chinese Embassy sa maong pamahayag isip tubag sa bag-o lang nga pagbungkag sa POGO hubs sa mga probinsya sa Tarlac ug Pampanga.
