CAMOTES-Usa ka bulan human gibuhian ngadto sa lasang, si Uswag, usa ka agila nga gikan sa Burauen, Leyte ang napalgang patay sa kadagatan sa isla sa Camotes, niadtong Sabado, Agosto 3, 2024.
Gikumpirma kini sa Philippine Eagle Foundation (PEF) niadtong Lunes, Agosto 5, kasunod sa mga taho sa pagkahulog sa agila sa baybayon sa Leyte kaniadtong Hulyo 30, 2024.
Matod pa sa official social media account sa Philippine Eagle Foundation nga gikasubo nila ang pagkawala sa Philippine Eagle nga si ‘Uswag’.
Nakuha ang iyang patayng lawas nga naglutaw sa kadagatan sa Ponson Island sa Pilar, Isla sa Camotes ning lalawigan sa Sugbo
Ang makaluluoy nga kamatayon ni Uswag gituohan tungod sa aksidenteng pagkahagsa niini sa dagat.
Kini nga kaso sa Philippine eagles crash-landing nga aksidente sa dagat maoy ika-9 nga dokumentado nga kaso sukad niadtong 1984.
Kahinumduman nga si Uswag ug laing agila nga ginganlag “Carlito” gibuhian sa kalasangan sa Burauen, Leyte niadtong Hunyo 28, 2024 isip programa sa pagpadaghan sa tanyag nga pambansang ibon nga Philippine Eagle.
