METRO MANILA-Gikompirmar sa usa ka high-ranking police officer nga kasagaran sa mga natala nga paglapas sa tawhanong katungod nahitabo atol sa ‘bloody drug war campaign’ ubos sa kanhi administrasyon ni Presidente Rodrigo Duterte.
Matud pa ni police colonel Jovie Espenido nga giabuso sa mga personahe nga suod sa kanhi presidente ug kaubanan sa PNP ang “tokhang” alang sa ilang personal nga interes.
Gibutyag ni Espenido nga nakalapas sa tawhanong katungod ang kapolisan aron makab-ot ang ilang target.
Tungod sa quota nga 50 ngadto sa 100 ka mga drug suspect ang mapatay kay katumbas og P20,000.00 ang reward nga madawat sa mga pulis.
Gipasabot ni Espenido nga sa iyang bahin, ang ilang gihimo mao ang pag-surrender sa mga drug suspects aron sila mapaubos sa rehabilitasyon.
Dugang ni Espenido nga dihang nadestino siya sa Ozamiz City, gipatawag siya sa hepe sa PNP ug karon si Sen. Ronald dela Rosa nga dili hilabtan ang usa ka mayor tungod kay usa siya ka small town lottery operator ug gidudahang drug lord.
Ingon man nga ang intelligence funds ug kwarta gikan sa Philippine offshore gambling operations (POGOs) gigamit sa pagpundo sa reward system.
