Mipahayag sa iyang habig ang kanhi Mayor sa lungsod sa Consolacion sa amihanang Sugbo sa giatubang niinig pagbali sa Korte Suprema sa desisyon sa 2009 illegal mining of limestone case ubos sa iyang pangan.
Pinaagi sa eksklusibong pakighinabi sa Bombo Radyo Cebu News Team kang former Consolacion Municipal Mayor Avelino “Avel” Gungob Sr. sa programang Bombohanay Bigtime karong Miyerkules sa buntag, Disyembre 31, 2025 gilatid niini ang iyang kasubo sa pagbali sa desisyon gikan sa kinatas-ang hukmanan.
Sumala pa ni Gungob Sr. nga angulo sa “political harrasment” ang nahitabo kaniya tungod kay aduna siya nakabangga nga mga lokal nga politiko sa maong lungsod diin gilatigo siya sa mga maniobra iyang mga kaatbang.
Gisaysay niini nga para lang sa kaayuhan ug maayong kaugmaon sa lungsod ang iyang tinguha sa maong pagkabkab og earth materials kay para sa mga road projects sa kabukiran nga giyagyag sa Sitio Laray, Barangay Jugan sa susamang lungsod nga karon nahimuslan isip reclaimed areas.
Nag-atubang sa silot nga perpetual disqualification for public office ug kanselasyon sa pension gikan sa GSIS si Gungob Sr. tungod sa maong kaso.
Kahinumduman nga nag-atubang og kaso si Gungob Sr. nga giduso sa NBI ngadto sa Ombudsman nunot kaniadtong Nobyembre 2009 nga panghitabo diin nasikop ang mga dump trucks sa lungsod nga nagpas-an og limestone nga walay igong permiso nga kalapasan sa Philippine Mining Act of 1995.
Giapelar kini sa kanhi opisyal ang maong giatubang nga kaso ngadto sa Court of Appeals diin nakadawat siya og mas paborableng desisyon apan sa bag-ohay lang niadtong Agosto 2025 kay midesider ang Korte Suprema nga balihon kini.
