Gisugat og mga pagsaway online ang abiso sa pamunuan sa Cebu Institure of Technology – University (CIT-U) kabahin sa pagpahibalo niini sa pagpanumbalik sa physical onsite classes sa ilang tunghaan.
Sumala sa CIT-U Advisory niadtong Sabado, Oktubre 18 pinaagi sa ilang official social media account, gilatid niini ang sistema sa pag-eskwela ug pagtrabaho sa ilang mga kawani para karong Oktubre 20-26 nga nagsaysay nga na-acknowledge na sa Cebu City Office of the Building Official (OBO) ang mga gikinahanglan dokumento kabahin sa pagsuta sa kondisyon sa ilang mga edipisyo human sa pagtay-og sa October 13 magnitude 5.8 aftershock sa September 30 magnitude 6.9 nga linog nga adunay episentro sa amihanang Sugbo.
Dugang pa nga subay sa maong review sa mga dokumento kay nakita sa findings sa OBO nga anaa sa “proper order” ug “may be safely occupied” ang kahimtang sa unibersidad.
Gani naglatid na kini og kondisyon kabahin sa ipahigayong eksaminasyon sa Basic Education ug College programs ug nagpahimangno sa mga estudyante nga daling mugawas sa campus kung wala nay scheduled classes.
Naglatid pud og konsiderasyon ang maong unibersidad sa mga apektadong estudyante niini basta matuman lang ang gipangayong ebidensya sa ilang kahimtang o dokumentasyon. Ang mga sakop sa faculty kay gipahimangnuan sab nga ablihan ang ilang mga linya sa komunikasyon sa ilang mga estudyante kabahin sa pagsumiter sa maong dokumento.
Apan sa habig usab sa mga netizens nga gani pipila kanila kay nagpailang mga ginikanan sa mga tumutungha ang wala kauyon sa maong mando sa universidad nga daw nagbutang sa risgo sa kinabuhi sa ilang mga anak ang nahimong desisyon sa administrasyon sa CIT-U nga nagtandi pa sa ubang mga eskwelahan sa Sugbo nga nagpamati sa kahimtang sa ilang mga estudyante.
Gibaha sab sa “angry” ug “sad” ang maong post nga mukabat na sa kapin 10K ang reaksyong kasagmuyo niini.
Abli ang Bombo Radyo Cebu News Team sa pagpaminaw sa habig sa pamunuan sa CIT-U kabahin sa maong aligotgot sa mga ginikanan sa ilang mga estudyante.
