Gibalhog sa prisuhan ang usa ka lalaki nga nagpakaaron-ingnon nga deputized agent sa Land Transportation Office (LTO) human kini misulay sa pagpanghadlok sa mga traffic enforcers niadtong Marso 20, 2026.
Ang maong insidente nahitabo sa N. Bacalso Avenue sa dihang gipara sa mga personahe sa Cebu City Transportation Office (CCTO) ang usa ka pribadong sakyanan nga ilegal nga nisulod sa linya sa Bus Rapid Transit (BRT).
Imbis nga mokooperar sa mga otoridad, usa ka pasahero sa maong sakyanan nga nagsul-ob og “GONZCAF Security ID” ang nimando sa drayber nga dili ihatag ang lisensya.
Nangangkon ang maong lalaki nga siya usa ka deputized agent sa LTO ug gikuhaan pa niini og hulagway ang mga enforcer dungan sa hulga nga iyang i-report ang mga opisyal ngadto sa maong ahensya.
Apan human sa gihimong dinaliang beripikasyon ni LTO 7 Regional Director Atty. Wendel Dinglasan, nasuta nga ang maong indibidwal walay bisan unsang deputation o lehitimong awtoridad gikan sa ilang buhatan.
Tungod niini, gitun-an na karon ni RD Dinglasan ang pagpasaka og seryosong kasong kriminal batok sa maong tawo tungod sa pagpakaaron-ingnon isip opisyal sa kagamhanan.
Subay niini, subling nipahimangno ang LTO sa publiko nga dili gayod gamiton ang ngalan sa ahensya alang sa personal nga interes o aron makalikay sa kalapasan sa trapiko.
Giawhag usab sa buhatan ang katawhan nga i-report dayon sa labing duol nga buhatan sa LTO o kapulisan kung adunay masugatan nga mga indibidwal nga nagpakaaron-ingnon nga duna’y awtoridad sa dalan.
