CEBU – Wala igsapayan sa mga blood donors ang naghabo-habo nga panahon arun nga makaabot sa duha ka venue sa Dugong Bombo 2019 dinhi sa Cebu.
Wala pa lang nangabli ang duha ka mall, nagpaabot na sa gawas ang mga blood donors.
Usa na si William dela Cruz kung diin giingong usa kini ka regular nga blood donor sa Bombo Radyo Iloilo apan na-atol nga nagbakasyon kini sa iyahang kaliwat sa Consolacion, Cebu hinungda nga gipangita niini ang venue sa Dugong Bombo nga duol lang kaniya.
Matud pa nga nag-bisikleta lang kini gikan sa lungsod sa Consolacion paingon sa dakbayan sa Lapu-Lapu arun lang nga maka-donate ug dugo.
Samtang, gihimo usab nga bonding sa mag-amahan ang pagsalmot sa bloodletting activity sa Bombo Radyo.
Sila si James Tenebroso ug ang anak niini nga si Nathaniel Tenebroso ang wala magduha-duha sa pag-donate ug dugo sa dihang nasayran sa duha nga ipahigayon ang Dugong Bombo nga duol lang sa ilahang nahimutangan.
Gisaysay pa sa amahan nga biktima kaniadto ang iyahang anak sa sakit nga dengue ug sila natabangan pinaagi sa blood donation hinungdan nga sila usab karun andam nga mu donate ug dugo isip pagtabang usab sa nagkinahanglan niini.
Ang Dugong Bombo 2019 sa Bombo Radyo Cebu ang gipahigayon sa SM City Cebu ug Super Metro Lapu-Lapu.
