Kasagmuyo ang nabati sa transport cooperative nga gilangkuban sa modern public utility jeepney (MPUJ) sa Sugbo subay sa nahitabong dry run sa Cebu Bus Rapid Transit.
Matud pa ni Ellen Maghanoy, ang Chairperson sa Federation of Transport Cooperative nga naalkanse ang ilang mga kooperatiba gumikan sa walay bugto nga trapiko sa kadalanan.
Gani sugyot niini nga kinahanglang palapdan ang maong mga kadalanan nga agian sa mga Bus hilabi na nga adunay bahin sa package 1 nga agianan sa daghang mga sakyanan paingun sa lain laing lugar sa dakbayan.
Tataw ni Maghanoy nga magpabiling mag pas-an ang mga driver ug kooperatiba sa dakong utang nga gipalit sa modern jeepneys gumikan sa lain na usab nga karibal niini sa kadalanan ug gihangyo nga mas maayong tukion kini pag-ayo harun dili makabalda sa publiko.
Gipadayag usab niini nga dili lang ang ilang habig ang naapektuhan sa maong dry run gumikan lakip usab ng mga pasahero ug uban pang mga motorista.
Giklaro usab niini nga dili sila supak sa pagtukod sa BRT tungod kay kinahanglan usab nga mapalambo ang transportasyon apan giuna unta ang pilot widening diin palapdan ang karsada sa wala pa gitukod ang proyekto.
