MANILA – Sa sunod nga makigsulti ka ngadto sa mga langyaw gamit ang atong pinulungan, ayaw gayud butangi og American accent… kung mahimo lang. Basin madani sila sa imong natural nga dila.
Nag-una ang pinulungang Filipino isip “sexiest accent” sa Asya, base sa usa ka survey sa Big 7 Travel.
Gihulagway sa maong travel and food content portal nga “gentle and soft” ang Filipino accent hinungdan nga nadani pag-ayo ang dalunggan sa mga langyaw.
Anaa sa ika-21 nga pwesto ang Filipino accent sa top 50 nga sexiest accents sa tibuok kalibutan.
Samtang nag-una ang New Zealand sa mga sexiest accent sa tibuok kalibutan, ug gisundan kini sa South Africa, Irish, Italian, ug Australia. Ug gisundan sa Pilipinas ang Vietnamese ug Indian sa Asia.
Apan gitataw sa Big 7 Travel nga nag-base lang ang resulta sa survey sa mga opinyon sa mga tigbasa niini. (GN)
