CEBU CITY — Mihangyo ang Filipino community sa Italy ngadto ni Presidente Rodrigo Duterte nga kung mahimo luwason sila taliwa sa hulga sa coronavirus disease o COVID-19 sa maong nasud.
Sa report gikan sa Bombo International Correspondent nga si Hadassa Joy Bermudez, nabantayan niini nga halos limitado na ang mga kalihukan sa gawas ilabi na nga nagkasaka na ang kaso sa COVID-19 ilabi na sa Lombardy region.
Matud ni Bermudez, lumad nga taga-Lapu-Lapu City ug 10 ka tuig nang residente sa Brescia City, nga limitado ang mga establisimento sama lang sa mga pubs ug restaurants tungod lang sa maong sakit.
Sirado usab ang tunghaan sa maong lugar ug limitado ang gipahigayong mga santos nga misa, base na sa gipatumang city ordinance.
Bisan pa man og limitado ang operasyon sa mga establisimento, “business as usual” gihapon gumikan kay padayon pang nanarbaho ang mga trabahante.
Dugang pa niini nga gusto na untang ipaubos sa repatriation ang mga Pilipino sa Italy alang lang sa ilang kaluwasan ug sa tagsa-tagsa ka mga pamilya.
Gipahimangnoan gihapon sila sa Italian health authorities nga mag-amping sa tanang panahon.
