Nakahiagom ang Filipino MMA fighter nga si Fritz Biagtan og technical knockout (TKO) sa mga kamot ni South African striker Edson Machavane.
Sa away sa duha ubos sa Flyweight Division of One Championship, wala na makabangon ang Filipino fighter human makaangkon og lawom nga samad sa iyang agtang sa ikaduhang hugna, hinungdan nga nahunong gayud ang away.
Ang tuo nga siko ni Machavane naigo sa agtang ni Biagtan ug sulod sa pipila ka Segundo napuno na sa dugo ang nawong niini.
Ingon man nga gusto sa Filipino fighter nga ipadayon ang away, apan ang opisyal nga doktor sa One Championship nakahukom nga ihunong kini sa hingpit, diin 35 segundos na lang sa ikaduhang hugna.
Ang kapildihan ni Biagtan maoy ikaduha sa iyang karera isip propesyonal nga MMA fighter sa One Championship, samtang ang iyang sunodsunod nga kadaugan nagpabilin sa tulo ka away ug niining tulo ka away, nakadaog siya og duha pinaagi sa knockout.
Samtang sa habig ni Machavane, kini ang una niyang kadaugan ubos sa One Championship.
