Nipagawas ang Department of Foreign Affairs (DFA) og notice alang sa mga Filipino nurse nga nangita og trabaho sa New Zealand nga mag-amping tungod kay sa pagkakaron walay trabaho nga gitanyag alang sa mga langyaw nga nurse o Internationally Qualified Nurses (IQNs).
Ang maong pahimangno gikan sa Philippine Embassy sa Wellington, New Zealand human masayran nga adunay pipila ka mga indibidwal ug ahensya nga mitanyag sa pag-facilitate sa pagkuha sa mga langyaw nga nars pinaagi sa pag-atiman sa ilang pagbyahe sa New Zealand gamit ang visitor visa aron makakuha og Comprehensive Assessment Program (CAP) o Objective Structured Clinical Examination (OSCE) alang sa mga nars ug mag-aplay alang sa pagparehistro sa Nursing Council sa New Zealand.
Giklaro sa DFA nga bisan og lehitimong possession ang pagkuha sa maong eksaminasyon sa pagpraktis sa nursing sa New Zealand, gitataw nga dili kini makagarantiya og trabaho tungod kay matud pa nagdepende kini sa lain-laing mga butang sama sa lokal nga panginahanglan sa mga nars ug ang abilidad sa mga nars.
Sumala sa embahada, nakadawat sila og mga taho nga adunay mga Internationally Qualified Nurses nga mibiyahe sa New Zealand gamit ang mga visitor visa nga pwersadong gipapahawa sa nasud sa dihang na-expired ang ilang mga visa tungod kay wala sila makakita og trabaho tungod sa kakuwang sa mga oportunidad.
Hinungdan nga giawhag sa Embahada ang mga Filipino nurses nga seguradohon nga aduna silay trabaho nga masudlan sa maong nasud sa dili pa mobiya sa Pilipinas, lakip na ang lehitimong tanyag nga trabaho nga adunay verified contract gikan sa accredited employer ug katugbang nga working visa nga giisyu sa NZ Immigration.
