CEBU – Nakalangkat na sab og titulo si Filipino triathlete August Benedicto human gipatigbabawan ang men’s division sa Megaworld Ironman 70.3 Philippines kagahapon, Agusto 7, 2022, sa Mactan Newtown sa dakbayan sa Lapu-Lapu.
Taudtaod man tuod nga wala kini nakakombati sa maong kompetisyon gumikan sa Covid-19 pandemic apan gipakita sa 38 anyos nga si Benedicto nga wala gihapon matay-i ang iyang kapabilidad.
Mirehistro kini og oras nga 4:29:16 aron angkunon ang ikalima niyang overall men’s title.
Human sa lumba, nagpasalamat si Benedicto sa Kahitas-an ug sa abiba ug suporta sa mga Cebuano sa triathletes nga sama kaniya.
Gipasabot ni Benedicto nga ang abiba sa mga tawo makahatag kanila og dugang enerhiya ug kadasig sa pagtiwas sa malisod nga lumba.
Si Benedicto, kinsa nagbase na karon sa Germany, katapusang nisalmot og Ironman event sa Cebu niadto pang 2019 diin igo lang siyang nahiluna sa ikaduhang pwesto.
