Nadugangan ang kaso sa mga nabuthan og pabuto nunot sa holiday season.
Anaa na sa 69 ang kinatibuk-ang gidaghanon sa Firecracker-related injuries ug matod pa sa Department of Health nga aduna nay 26 ka bag-ong kaso sa samdan tungod sa pabuto sa tibuok nasud kagahapong adlawa, Disyimbre 26, 2024.
Gisugdan sa DOH ang pagmonitor niining insidente nga may kalabutan sa pabuto sa Disyembre 22 ning tuiga.
Sa talaan sa ahensya, 58 sa mga biktima ang menor de edad ubos sa edad nga 19 ubos, samtang ang uban anaa na sa edad 20 ug pataas.
Gikataho usab nga kadaghanan sa mga biktima mao ang mga bata o mga batan-on nga mao ang mga ga una og gamit og pabuto.
Sumala pa sa DOH, 86% sa mga naangol sa paggamit og illegal nga pabuto sama sa “boga” o PVC cannon. Dugang pa, 74% sa mga biktima aktibong naggamit og pabuto.
Base sa datus, 65 sa mga biktima mga lalaki samtang upat ang babaye.
Pahimangno sa DOH nga ang paggamit sa pabuto mahimong hinungdan s grabe nga kadaot sama sa amputation bahin sa lawas, pagkabuta, pagkabungol, pagkahilo, pagkasunog, permanente nga kadaot sa baga, ug bisan pa kamatayon.
Gikabutyag pud sa maong ahensya nga kasagaran modaghan ang kaso sa mga nabuthan sa mga pabuto kay mao ang adlaw sa pagsaulog sa bag-ong tuig.
Kahinumdoman nga sa miaging tuig, gatosang insidente sa firecracker-related injuries ang natala human sa selebrasyon sa Bag-ong Tuig.
