LILOAN, CEBU- Giklaro sa Department of Public Works and Highways (DPWH) Regional Office 7 nga kompleto na ang flood control project nga nahimutang sa Cotcot River sa Liloan, Cebu, nga gisugdan aron panalipdan ang komunidad batok sa posible’ng pagbaha.
Base sa opisyal nga pamahayag, ang proyekto nahuman niadtong Marso 10, 2025, pinaagi sa joint venture sa Alpha & Omega General Contractor & Development Corp. ug MC Geometric Proportions, Inc.
Ang proyekto, nga gitawag og “Construction of Flood Mitigating Structure – Revetment Type,” adunay kinatibuk-an nga 476.781 ka linear meters nga estruktura, nga gitukod sa left bank sa Cotcot River kon tan-awon gikan sa upstream side, nga adunay revised contract amount nga ₱149.5 milyon.
Gipasiugda sa DPWH nga ang maong estruktura nagserbisyo na karon isip unang panagang batok sa baha, ilabi na sa mga komunidad nga sagad maapektuhan sa pagbaha sa mao nga dapit.
Giila usab kini nga kabahin sa padayon nga paningkamot sa DPWH sa pagpanday og resilient ug sustainable infrastructure alang sa kaluwasan sa kinabuhi ug kabtangan sa katawhan.
Gipasiugda usab sa DPWH nga ang ilang buhatan magpadayon sa pagserbisyo uban ang transparency, accountability, ug efficiency sa tanang proyekto nga gipasiugdahan ubos sa mga programang pang-imprastruktura sa gobyerno.
