Nakitaan og pagbawi ang foreign reserves sa Pilipinas, buwan sa Pebrero ning tuiga.
Basi sa pasiunang datus gikan sa Bangko Sentral ng Pilipinas (BSP), gross international reserves (GIR) o reserves sa dolyares, ug uban pang foreign currencies ug bulawan nga magamit sa pagbayad sa mga obligasyon sa gawas sa nasud, misaka ngadto sa $106.7 bilyon sa miaging buwan gikan sa $103.3 bilyon nga natala niadtong Enero 2025.
Nakita nga kini igo na aron matabonan o matubag ang mga panginahanglanon sa pag-import sa nasud ug mga bayad sa langyaw sulod sa 7 ug tunga ka buwan, sumala sa sentral nga bangko.
Ingon man ang kasamtangan nga GIR level kay igo na aron mabayran ang mga short-term foreign debt sa 3.8 ka higayon, nga nagpakita nga ang financially stable na ang atong nasud.
Matod sa BSP, ang binuwan nga pag-usbaw sa foreign reserves niadtong Pebrero dungan sa pag-usbaw sa mga deposito sa gobyerno sa central bank nunot sa malampusong fundraising efforts niini nga gisuportahan sa pagsaka sa presyo sa bulawan sa global market ug net income gikan sa investments sa BSP sa gawas sa nasud.
Kahinumduman nga bag-o lang nahimong init nga hisgutanan ang GIR sa nasud human niingon si kanhi Presidente Rodrigo Duterte nga giingong gikawat ug gibaligya kini ni Presidente Ferdinand Marcos Jr. gold reserves sa nasod, butang nga gipanghimakak sa Malacañang ug niinsister nga giklaro na sa BSP ang isyu may kalabotan sa pagbaligya og bulawan sa miaging tuig.
