CEBU CITY — Nimando si Cebu Provincial Governor Gwendolyn Garcia nga ipaubos sa mandatory quarantine ang mga byahero gikan sa tanang kanasuran sugod karong Martes, Marso 17.
Base sa Executive Order No. 5-J nga gi-isyu sa gobernadora kagahapon, kinahanglang ipaubos sa 14-day quarantine ang tanang mga mobisita sa Sugbo ngadto sa gitagana nga mga pasilidad sa lalawigan.
Gimanduan sa gobernadora ang mga local chief executives ug mga barangay kapitan nga striktong ipatuman ang maong protocol sa tinguha nga malikayan ang coronavirus disease.
Giyahan usab sila sa mga sakop sa kapulisan ug kasundaluhan alang sa pagpatuman sa maong order.
Kini ang nahimong lakang ni Garcia human nga nahimong pandemic ang COVID-19 diin nagkasaka na ang kaso niini sa Pilipinas.
